【專家分析】美股未跌夠等跌多5%再撈貨

【Now財經台】美股喺3月份都幾傷，如果以昨晚(30日)收市計，美股3大指數中，標指已自高位回落咗近10%，摩根士丹利最新亦下調全球股票評級，由「增持」降至「與大市同步」，主要係油價干擾市場嘅時間、規模嘅不確定性仍然較大。高盛交易員就認為，對沖基金大舉做空，一旦戰事降溫，股市有望迎來大反彈，而同經濟主題有關嘅交易產品空倉，升至10年以嚟最高水平。點睇美股後市？

高富金融集團投資總監梁偉民認為，美股暫時調整咗約10%，佢覺得反而係合理啲，因為美股之前只係調整咗約5%，其實唔係太足夠，始終油價升咗好多，影響全球經濟及通脹，股市應該有一個更明顯嘅調整，以反映返呢啲負面或不明朗因素。

Wyman又話，呢一刻係咪可以撈底？佢認為回調幅度仍未夠，如果睇返2022年，俄烏戰事開打導致油價飆升，當時美股曾重挫20%至30%，始終股市要有一定跌幅，先可以足夠反映油價飆升、局勢不明朗等負面因素，因此，佢認為股市起碼要回調15%，意味等股市再跌多約5%，到時先再考慮撈唔撈貨。

亞洲股市方面，梁偉民就指...