盤房來料丨北水趁假後反彈減持 限制反彈升幅
【信報財經新聞】喺幾日香港復活節長假期間，中東戰事都無大變化，除咗美軍上演咗一幕不惜一切代價去拯救美軍飛行員行動之外，美伊談判仍未見進展。喺過去24小時，有關美伊戰事消息反轉再反轉，令期油價格及股市如坐過山車般大上大落。本來，侵侵喺對伊朗設下停火死線到臨前夕，伊朗石油樞紐哈爾克島(Kharg Island)及其他基建設施據報受襲擊，一度令市場擔心戰事進一步升級，令美股周二早段曾下跌，但其後三大指數回穩。道指周二曾挫455點，收市跌幅收窄至85點或0.18%，報收46584；標指倒升5點或0.08%；納指倒升21點或0.1%。
星期一同二晚美股已復市，但香港呢邊假期，阿Man見又無乜特別消息，都繼續放假，完全無乜點睇美股，假期前中咗320美元買盤嘅TSM，呢兩日表現唔錯，至今早喺盤後時段急升至362元，較買入價升咗一成有多，暫時都係持有先，本來都係打算趁低吸納，等今年破頂上去400美元。至於ONDS同ALAB就假期前到咗撈貨位，周四晚美股走勢尚算穩定，ONDS喺8.5美元接咗一注，ALAB就107美元接咗一注，呢兩日兩股表現算唔錯，仍然企到啲防守位，呢兩日如果分別到短炒目標價，即係10.5至11.5同埋120-125又可以食糊。
NQ由噚晚嘅低位接近24000水平，至今早喺亞洲時段期貨急彈至25100水平，足足反彈成千點，差不多彈到100日線25132附近，相信都會見阻力要抖抖。今晚NQ好淡分水嶺25150，呢個分水嶺好可能就已經有阻力，由於急彈咗成千點，反而睇下面支持，守得到就搵位做好倉，下面支持25050/24950/24850，守到24800-24850條50日線，就試下做好倉，博個NQ上返25000/25050/25150，若然企得穩25150，咁上面就睇高少少，去埋25250/25350。
至於紐約期油隔晚一度急升至117.63美元，但其後升勢回順。至今早亞洲時段，過咗美國所定停火死線後，侵侵又喺社交媒體貼文表示，美方同意暫停對伊朗轟炸及攻擊行動，為期兩周。侵侵又TACO，但今次有伊朗一名高級官員向其他媒體表示，德黑蘭方面正積極考慮巴基斯坦提出嘅「停火兩周」請求，當中包括請求伊朗開放霍爾木茲海峽兩周以示善意。唔係侵侵單方面吹風，連伊朗都承認坐低傾下，亞太區股市受消息刺激急升，而道指期貨亦於亞洲時段急升近千點，而紐約期油則急挫逾一成，回落至100美元之下。
今早港股裂口高開，恒生指數高開656點，不僅收復20日線25365及50周線25384，早段曾高見25872半日高位，暫時睇住25800-25850大約係條10周線爭持。短線首個支持位25600-25650，大約條30日線，要保持反彈之勢不變，企穩20日線25350-25400係基本。如能企穩10周線，稍後有望進一步挑戰50及100日線，即26100-26160，但估計要企穩呢兩條線要啲時間，暫時26100-26150有一定阻力。
喺中東戰火仍未完全平息下，估計港股仍然會隨戰事消息上落，對於美伊雙方達成協議完全停火仍有保留，預期兩周談判期市況仍反覆；一旦又傳出負面消息，下面就睇住25600-25650，25350-25400呢兩個支持位先。由於今日爆咗個大裂口上升，睇下嚟緊兩日會唔會返落去25300-25350呢啲位回補裂口，順便試下個支持力度。估計短線指數或於25300-26300之間上落。既然係上落市，可以炒住股先，資金或者喺唔同板塊輪動，阿Man今早就留意到順豐同城(09699)，業績後股價表現唔錯，今早股價重越20日線，技術走勢明顯轉強。
順豐同城較同業抵買
順豐同城已於上周公布2025業績，業績符合市場預期。早前國務院反壟斷委員會已正式啟動對外賣平台「拼補貼、控流量」等問題的調查；令平台行業從「平台強勢壓費率」轉向「公平競爭」，其實無論即時零售終局之戰誰勝誰負，即時配送行業如同即時零售嘅必要配套，即時零售與即時配送行業將雙雙保持高速增長。順豐同城作為稀缺嘅第三方平台，承接全渠道訂單，有望直接受惠即時零售需求帶動即配訂單高增長局面。而順豐同城2025年嘅業績，正正反映咗公司商業模式具備成長可持續性，成功突破「增量增收與增利不可兼得」嘅行業痛點。而公司嘅全場景能力已構成護城河，無論面向商家(To B)、面向消費者(To C)及最後一公里配送，均見健康成長能力，三方面業務分別錄得60%、14%及42%嘅年增長率。
順豐同城繼續深耕下沉市縣，加強縣域覆蓋，2025年縣域收入規模同比保持高雙位數增長，日均訂單量同比翻倍提升；透過進一步提升鄉鎮區域覆蓋，不斷織密其全國性配送服務網絡。公司去年成功構建並規模化落地覆蓋多AI智能體應用；圍繞營銷、應答、審核、數據與研發等關鍵環節展開，全面賦能運營提效與服務升級，AI 智能體應用將持續為公司創造效率與體驗優勢。加上，無人車商業化落地逐步見成效，令順豐同城「騎手+無人」混合配送網絡其能成為更穩定運力網絡，同時兼顧成本及履約效率。睇返順豐同城嘅估值亦較同業為低，有一定追落後空間，睇返傑富瑞(Jefferies)及中金嘅報告，就分別畀咗18元及17.8元嘅目標價。阿Man就保守少少，先睇返13至15元先，現價收集，防守位10元，都有一定值博率。
麥狄文
(徐狄怡‧證監會持牌人)
